Inkou Rwan Lan Inkamriak |Inpui Kabui|Kabuikhullen (Lwanzaang

An explanation to the visitor Image credit: Isaac Inkah

Mikatam na heiba meng ngaisu maknu zamai. Heiba riak ah Kabuikhullen namlui bina km 5 khaak namla nu riakpi amnu we. Kama Inkou rwan (referring to Kourang/Kharam) na Lwanjaangbi hung lung nu kaan bi banina inmwan khou lung lang taram hungai ye diye. Atiga Lwanzaang rwan patso rwanna pilai ye kabia da ani talei bi lunglaye saangbaan la ung dam zwe diga kabia ngaak e. 

Inkourwan na saangbaan la lung damzwe dinuba bani tamban ra lu lung damzwe dinuwe. Inkou rwan na bakaan kasem Inpui lungdung bi hung lung thang nu nam khatle meiri Pantong khatle Zeilwaang bi tamga amme. Atiyeda Khongsai rwan om luitakrai (history) bi phaang nge be ani Inpui talei ya Khongsai (Kuki) rwan omme diga hiak thang ongme khatle hiak ongme. 

Heiya bani na bani taram lang loukhut lang luitakrai bacha kanu we. Puichi khatle Kabuikhullen area ding nga banina meng panga hiak thange balang be bani om patso rwan kama lung thang sianu riak taye. Atiyeda Khongsai rwan na Inpui taram bi niluga (beg) toluga hung lung nuzwe. 

Bani om taram me diga luitakrai construct to ongnu heiya ani Inpui sarwan cheksin lang amme. Tamenglong district ding nga Khongsai rwan omme diga bani na intun intun tamga local/regional/national newspapers bi tamga hiak ongme.

Part of the stone, Image credit: Isaac Inkah

Image credit: Isaac Inkah

Inkou rwan lunga ani Naga le karaan thounu kaan bani na heiba lung tum dinga chenlang swan bi ran khut luga thangsia nu lunge. Bakaan kasem aniram Lwanzaang rwanna pam amdingbo diga thukka kakhan ngaak e. 

Khongsai rwan lung thang nu nun om lan (treasure) kakung nu hoithang sianu rwe diga lou kale ngaak e. Heiba lunga nat tak nulung e. Likli (glass) ding hak na ret chat ngamnu lunge. Atiga 2016 kum aniram Lwanjaang rwanna bomb fit toluga heiba lung ding tobak swak lu phaangnu we atiyeda basung la khat chale maak ong ngaak e.

Ageiya ani para lou lang amsip amme.
1. Lwanzaang nga Inpui rwan namlui khat rwe tiyeda kama om luitak rai om pot baraan loi darwe (see Re-Imagining the Existence of Two Inpui Villages, Kabuikhullen & Haochong in this blog).

2. Heiya Lwanzaang bi zamak e, Inpui lungdung bi baraan loi tanu rwe. Khwasei maknu meithaan bi Inpui rwan potlui langon lang kalei kadai lu zwan damnu meiri inza amdamme khatle reikung maktabe khouring zwan salang tonu inza le amdame intun le am ongme. Inswan lang kakhan zo tizuba heibing nga sia nu na ani lang sakataknu khatle baze katak nu we.

The choice is ours.